Pîştî van mitalên vala û bêçare, Şînê biryar stend û dengekî bêkêr jê hat û hin bi hin reng lê vegeriya û bi sistayî destikê xwe bir ber bi devikê xwe, qey ta ew jî ji xwe re dinya gewrik bibîne!

- Dîsan keçike ne wisa? Xesiyê pirsî.
- Xulama te be, weke xezaleke werdî ye! Zînê bi kêf lê vegerand û du qerpalkên pak li keçika şemze pêça.
- Mizgîniyê bidin Hecî Reşo, herî ko bav li çol û pola ye! Xesiyê bi şermezayî got.
- Hemû dana Xwedê ye, çi keç çi kurr! “Nûrsê” baweriya xwe di vî warî de da û keçika wek lepekî da destên diya wê.
- navê wê bikim Gewrê! Dê bi dilgeşî got û keçik danî ser doşekê pî xwe.
- Navê wê tu dikî Gewrê, navê wê tu dikî Mewrê, ji min re weke hev e! ..Eva şîn, çê ye ko navê wê Şînê be! Xesiyê bême''''''''''''''''dî xwe got.
- Belkî bibe sebeb û Kawa vegere û warên wan şîn bibe! Zînê hêvîkir û zîvirî ser jinika çillîn û jê re got: Hela bê tu tiliya xwe nake devê wê, bera keçik fêrî mijandinê bibe û tu jî hinek dimis û rûn buxe.
PIŞTΠ 7 SALAN
  Margerêt li ber neynikeke mezin  hevde-hevde porê zer şkinî û hûna û çentekê pemba avêt ser pişta xwe, û di vê navê re Roz jê re sendewîşa "Hot-dog" pêçabû û çawa dê sendewîş danî ser mase, keça malê tê dahat û bibez berî da posta dibistanê.
  *       *       *
  Corc Hamilton li Riwanda raporteke dûdirêj amade dike û qet jibîr nekiriye ko telegramekê  ji keça xwe re bi rêke. Sibe 11 sebtember e, rojbûna Margerêtê ye û ma kullek di dilê wî de: Gelo wê Roz ji şêrîna ber dilê wî re "barbie"² kirȋbe? Naherê Roz tiştên wisa jibîrnake! Corc li xwe vegerand û ma mijûl ser roja sibe, dema ko raport û wêna wî di "Daily Mail"³ de, bê weşandin û xweziya wî ma bi wê wextê, gava ko Roz wêna wî şanî roniya çavên wî bike.
=  
  Morê, ne çente hebû, ne gore hebû, ne dibistan hebû, lê cengeke giran di navbera eşîra wê û eşîra Totsî de hebû. 11 sebtember e, Sebellî, li erdê pan bûye û ji pêvî xwînê û tivinga kelaşnikov û cendekên çend kuştiyan kesekî din li dora xwe nabîne! ..Mannê, Kêba, Sayko, Morê çi bi serê wan hatiye? Çi felek li wan geriya ye? Sebellî ji xwe pirsî û bi êş û nalîn, terrîşa serê xwe li birîna lingê xwe bada.
=   
  Şînê berdilka şîn li xwe kir û demeke dirêj li şeh geriya û bêxatir û maçîkirina dê, derî vekir û hêdî hêdî berî da mala Gulê.
=
 Kawa ev dora heyşt salên wî ye, ko ji malê derketiye û bê deng e û bê xeber e! Hinek dibêjin ew di şerrê Libnanê de hate kuştin! Hinekî din digotin nedûre ko ew li "Israîl"-ê dîl bûye! Civatên pîrekan digotin: Heye tuneye, mêrik ji xwe jineke "Libnanî" aniye û guhê xwe ji gellek merselan dînc kiriye.
=
 11 Simtember saet 11 û 11 xulek, namake şînesor bi pûl û bi mohr, kete destên Şînê
    Mamoste name ji xwendevana xwe re xwend û xwend  û dawiyê gihîşt silavan ji bav û dê re û herwisa Safînaz û herşeş xibşên xezalan, yek bi yek û nav bi nav, lê mixabin tenê navê Şînê di nav navan de, ne şînkir û ne sorkir.

------------------------------------------------------------
¹ Kesin, ne eşîrin û kurd bi çavekî kêm li wan dinerin.
² Bûka zaroka ye navdar e.
³ Rojnamak Barîtniye rojane ye.